nafarroa.eus
Autonomia-erkidegoetako selekzioak Tuteran lehiatuko dira ekainaren 27an eta 28an.
Tuterak ekainaren 27an eta 28an hartuko ditu Eskola Adineko Triatloiko CESA CSD Espainiako Txapelketak eta Autonomien arteko Txapelketa. Espainiako Triatloi Federazioaren (FETRI) egutegi nazionaleko hitzordu nagusietako bat da, eta estatuko lurralde guztietatik etorritako kirolariak, teknikariak eta laguntzaileak bilduko ditu.
Txapelketa gaur goizean aurkeztu da Tuteran egindako ekitaldi batean. Bertan parte hartu dute Nafarroako Kirolaren eta Jarduera Fisikoaren Institutuko (INDAF) zuzendari kudeatzaile Jorge Aguirrek eta antolakuntzan eta lankidetzan diharduten erakundeetako ordezkariek.
Bi egunez, Erriberako hiriburuak Espainiako autonomia-erkidego guztietako federazioen selekzioak hartuko ditu Eskola Adineko Triatloiko CESA Espainiako Txapelketa jokatzeko, haur eta kadete mailetan, baita Autonomien arteko Triatloiko Espainiako Txapelketa ere. Horrez gain, Autonomia Erkidegoetako Errelebo Mistoen Espainiako Txapelketak eta Errelebo Misto Inklusiboaren Espainiako Txapelketa jokatuko dira.
Tuterak lehen aldiz hartuko du FETRIren estatu mailako hitzordu handi bat
Txapelketa hauek antolatzea mugarri garrantzitsua da Tuterarentzat; izan ere, lehen aldiz izango da Espainiako Triatloi Federazioaren egutegi nazionaleko lehiaketa nagusietako baten egoitza.
Aurkezpenean, INDAFeko zuzendari kudeatzaile Jorge Aguirrek nabarmendu du garrantzitsua dela Erriberak lehen mailako kirol-lehiaketak hartzen jarraitzea.
«Horrelako Espainiako Txapelketak antolatzea albiste bikaina da Tuterarentzat eta Erribera osoarentzat; izan ere, goi-mailako kirola lurraldera hurbiltzen du eta Nafarroako eremu honek antolakuntzarako duen gaitasuna erakusten du».
Aguirrek gaineratu duenez, «Nafarroa kirol-ekitaldi handien antolaketan erreferentziazko erkidego gisa sendotzen ari da, berriki Iruñean T100 proba antolatuta erakutsi dugun bezala. Horrelako probek kokapen hori indartzen laguntzen dute, eta Nafarroa 2027ko Kirolaren Europako Eskualde izendatu izana babesten dute; izan ere, urte luzez kirolaren alde egindako lana aitortzen duen izendapena da».
Ebro ibaia eta hiriko hainbat gune izango dira proben agertoki. Igeriketako segmentua Merche Marín Udal Kirol Portuan egingo da; txirrindularitza eta korrikako ibilbideak, berriz, Tuterako eta inguruko hainbat gunetatik igaroko dira.
Bi lehiaketa-egun
Lehiaketa ekainaren 27an, larunbatean, hasiko da Eskola Adineko Triatloiko Espainiako Txapelketako eta Autonomien arteko Espainiako Txapelketako probekin, gizonezkoen zein emakumezkoen kategorietan.
Ekainaren 28an, igandean, errelebo mistoen txanda izango da, Autonomia Erkidegoetako Errelebo Misto Inklusiboa barne. Modalitate horrek talde berean desgaitasuna duten eta ez duten kirolarien parte-hartze bateratua sustatzen du.
Txapelketa hauek Nafarroako Gobernuak, INDAFen bidez, estatu mailako kirol-lehiaketak sustatzeko egiten duen apustuaren barruan kokatzen dira. Helburua da kirola sustatzea, lurralde-kohesioa indartzea eta Nafarroa kirol-ekitaldi handien egoitza gisa proiektatzea.
