nafarroa.eus
Instalazioa asteko egun guztietan irekiko da, jaiegunak barne, goizeko eta arratsaldeko ordutegi jarraituarekin.
Iruñeko Larrabide Estadioa Kirol Teknifikazioko Zentroak bere irekiera-ordutegia aldatuko du 2026ko urtarrilaren 1etik aurrera, kirol-jarduerarako sarbidea errazteko eta bai kirolariei bai, oro har, herritarrei eskaintzen zaien zerbitzua hobetzeko helburuarekin. Data horretatik aurrera, instalazioa astelehenetik igandera eta jaiegunetan irekita egongo da, 7:50etik 21:50era, etenik gabeko ordutegian, salbuespenezko data jakin batzuetan izan ezik.
Instalazioa itxita egongo da egun osoan urtarrilaren 1ean, uztailaren 7an eta abenduaren 25ean. Beste egun jakin batzuetan (urtarrilaren 6an, maiatzaren 1ean, uztailaren 6an, abuztuaren 15ean, abenduaren 3an, abenduaren 24an eta abenduaren 31n), berriz, arratsaldez soilik itxiko da.
Larrabide Estadioa Kirol Teknifikazioko Zentroa instalazio publiko bat da, Nafarroako errendimendu-kirolarien prestakuntzara bideratua, Nafarroako Kirolaren eta Jarduera Fisikoaren Institutuak (INDAF) sustatutako teknifikazio-programen eta kirol-selekzioen bidez. Estadioak kirol-modalitate askotan entrenatzeko aukera ematen du, besteak beste: atletismoa, saskibaloia, eskubaloia, boleibola, 8ko futbola eta 11ko futbola, areto-futbola, judoa, karatea, taekwondoa, mahai-tenisa eta trinketea. Gainera, Larrabide Iruñeko atletismo-estadio nagusia da, eta Tuterakoarekin batera Nafarroan homologatutako bi bakarretako bat; horrek sendotu egiten du foru-kirol sistemaren barruan duen eginkizun estrategikoa.
Herritarren erabilera eta espazioen erreserbak
Teknifikazio-zentro gisa duen funtzioaz gain, Larrabide Estadioa kirol-jarduera orokorrerako gune ireki gisa ere pentsatua dago. Errendimendu-programak okupatzen ez dituen ordutegietan, belar artifizialeko futbol-zelaia (berriki berritua), trinketea eta beste kirol-espazio batzuk alokatzeko aukera ematen du.
Edozein pertsonak edo taldek, abonatua izan beharrik gabe, erabilera-eskaera egin dezake eskuragarri dauden ordutegietan. Espazioa esleitu ondoren, dagokion zenbatekoa aurrez ordaindu beharko da —transferentzia bidez edo banku-txartelarekin— erreserba formalizatzeko. Eskaerak telefonoz, posta elektronikoz edo aurrez aurre egin daitezke instalazioko sarbide-kontrolean, Zangoza kalea 34, Iruñea helbidean.
Informazio gehiago jasotzeko, prezioak kontsultatzeko, erabilera-arauak ezagutzeko edo erreserbak egiteko, interesdunek 848 43 15 60 telefonora deitu dezakete, elarrabi@navarra.es helbidera idatzi edo INDAFen webgunea kontsultatu, Larrabide Estadioa Kirol Teknifikazioko Zentroari eskainitako atalean.
Ordutegi berri honekin, Larrabide Estadioak instalazio ireki, irisgarri eta erreferente izateko bokazioa indartzen du, bai goi-mailako kirolarentzat bai herritarren kirol-jarduerarako.
